Америк, Англи, Австрали зэрэг улсуудтай харьцуулбал Канад улсын их дээд сургуулиуд гадаад оюутнуудад харьцангуй бага тэтгэлэг олгодог. Гэсэн хэдий ч бид Канад улсад зарлагддаг гадаад оюутнуудад зориулсан тэтгэлгийг судалж, холбогдох эх сурвалжийг та бүхэндээ хүргэж байна.
Лестер Б. Пийрсоний Олон улсын тэтгэлэгт хөтөлбөр
Лестер Б. Пийрсоний Олон улсын тэтгэлэгт хөтөлбөр нь Торонтогийн их сургууль дээр хэрэгждэг бөгөөд сурлагын амжилтаараа тэргүүлэгч, бүтээлч, манлайлагч олон улсын оюутнуудад олгогддог тэтгэлэг юм. Бакалаврын хөтөлбөрт суралцах шилдэг оюутнууд 4 жилийн турш сургалтын төлбөр, байр, ном сурах бичгийн төлбөрийг тэтгэлэг болгон авдаг байна.
Тэтгэлгийн албан ёсны вэбсайт: https://future.utoronto.ca/pearson/about/#about
Йорк их сургуулийн Олон улсын оюутнуудад зориулсан тэтгэлэгт хөтөлбөр
Йорк их сургуульд тэнцсэн, сурлагын амжилтаараа тэргүүлэгч гадаад оюутнууд уг тэтгэлгийг авах эрхтэй бөгөөд Бакалаврын хөтөлбөрт 4 жилийн хугацаанд 60.000-100.000 долларын тэтгэлэг авах боломжтой.
Тэтгэлгийн албан ёсны вэбсайт: https://futurestudents.yorku.ca/funding#intl
Бритиш Колумбын их сургуулийн Олон улсын оюутнуудад зориулсан тэтгэлэгт хөтөлбөр
Бритиш Колумбын их сургууль гадаад улсаас ирсэн шилдэг оюутнуудад зориулж жил бүр 10 сая канад долларыг тэтгэлэг болгон олгодог байна. Бакалаврын хөтөлбөрт суралцах гадаад оюутнууд тус тэтгэлэгт хүсэлт гаргах боломжтой.
Тэтгэлгийн албан ёсны вэбсайт: https://you.ubc.ca/financial-planning/scholarships-awards-international-students/international-scholars/
Карлетоний нэрэмжит тэтгэлэг
Карлетон их сургууль Бакалаврын хөтөлбөрт 90% ба түүнээс дээш хувийн элсэлтийн амжилт үзүүлсэн оюутнууддаа нэрэмжит тэтгэлгүүдийг олгодог байна. Үүнд Сургуулийн захирлын нэрэмжит тэтгэлэг, Ричард Леварийн элсэлтийн тэтгэлэг, Карлетон их сургуулийн амжилтын тэтгэлэг гэх мэт 4 жилийн сургалтын төлбөрийг санхүүжүүлэх 20.000-30.000 канад долларын үнэ цэнэ бүхий тэтгэлгүүд олгогддог.
Тэтгэлгийн албан ёсны вэбсайт: https://carleton.ca/awards/scholarships/entrance-scholarships-for-new-students/scholarships/
Калгари олон улсын оюутнуудын элсэлтийн тэтгэлэг
Калгари их сургууль Бакалаврын хөтөлбөрт элссэн шилдэг гадаад оюутнууддаа элсэлтийн тэтгэлэг олгодог байна. 4 жилийн Бакалаврын сургалтын нийт төлбөр 60.000 долларыг тус тэтгэлэгт олгодог аж.
Тэтгэлгийн албан ёсны вэбсайт: https://www.ucalgary.ca/registrar/awards/university-calgary-international-entrance-scholarship
Дэлхийн манлайлагчдад зориулсан Виннипег Ерөнхийлөгчийн тэтгэлэг
Жил бүр дэлхийн өнцөг булан бүрээс ирж суралцаж буй шилдэг оюутнуудад анх элсэн суралцахад Виннипег их сургуулиас Ерөнхийлөгчийн тэтгэлэг болох 3500-5000 доллар олгодог байна.
Тэтгэлгийн албан ёсны вэбсайт: https://www.uwinnipeg.ca/graduate-studies/funding/masters-and-doctoral-awards/presidents-scholarship/index.html
Хамбер коллежийн олон улсын оюутнуудын элсэлтийн тэтгэлэг
Жил бүрийн есдүгээр сар, нэгдүгээр сард Хамбер коллежид шинээр элссэн олон улсын гадаад оюутнуудад сургалтын төлбөрийн бүтэн болон хагас тэтгэлгийг олгодог байна.
Тэтгэлгийн албан ёсны вэбсайт: https://international.humber.ca/student-services/managing-your-finances/scholarships-awards.html
Мастер, Докторын оюутнуудад зориулсан тэтгэлгүүд
Ваньер Канадын тэтгэлэг
Ваньер Канадын тэтгэлэг нь дэлхийн түвшний докторын оюутнуудыг татах, Канад улсыг судалгаа шинжилгээний төв болгох зорилгоор зарлагддаг хөтөлбөр юм. Канадын их дээд сургуульд докторын зэрэг хамгаалах хүсэлтэй шилдэг гадаадад оюутнуудад жил бүр 50.000 долларын тэтгэлэг олгодог байна.
Тэтгэлгийн албан ёсны вэбсайт: https://vanier.gc.ca/en/home-accueil.html
Манитобагийн их сургуулийн тэтгэлэг
Манитобагийн их сургуулийн тэтгэлэг нь бүтэн цагийн мастер болон докторын хөтөлбөрт элссэн шилдэг гадаад оюутнуудад олгогддог тэтгэлэг бөгөөд докторын оюутнуудад жил бүр 18.000 доллар, мастерын оюутнуудад 14.000 доллар олгогддог байна.
Тэтгэлгийн албан ёсны вэбсайт: https://umanitoba.ca/graduate-studies/funding-awards-and-financial-aid/university-manitoba-graduate-fellowship-umgf
Пьер Эллиот Трюдо сангийн Докторын тэтгэлэг
Пьер Эллиот Трюдо сангийн Докторын тэтгэлэг нь нийгмийн шинжлэх ухаан, хүмүүнлэгийн чиглэлээр докторын зэрэг хамгаалах гадаад оюутнуудад олгогддог бөгөөд Канадын аль нэг их сургуульд дээрх мэргэжлээр 1 болон 2 дахь жилдээ суралцаж буй докторын оюутнууд хүсэлт гаргах боломжтой. Тэтгэлгийн дээд хэмжээ жилд 60.000 хүртэлх доллар.
Тэтгэлгийн албан ёсны вэбсайт: https://www.trudeaufoundation.ca/
Ватерлоо их сургуулийн Мастерын тэтгэлэг
Ватерлоо их сургуулийн Мастерын тэтгэлэг нь мастерын судалгаанд суурилсан хөтөлбөрт элсэн суралцах гадаад оюутнуудад олгогддог тэтгэлэг юм. 5 улирлын турш улирал бүр 2500 долларын тэтгэлэг авах боломжтой.
Тэтгэлгийн албан ёсны вэбсайт: https://uwaterloo.ca/graduate-studies-postdoctoral-affairs/awards/international-masters-award-excellence-imae
Калгари их сургуулийн тэтгэлэг
Калгари их сургууль нь гадаад оюутнуудад зориулсан олон төрлийн тэтгэлэгт хөтөлбөрүүдийг хэрэгжүүлдэг бөгөөд 1000-40.000 доллар хүртэл тэтгэлэгт хүсэлт гаргах боломжтой.
Тэтгэлгийн албан ёсны вэбсайт: https://grad.ucalgary.ca/awards/award-opportunities/search-awards
